Mae aelodau o Gabinet Cyngor Bwrdeistref Sirol Caerffili wedi ymweld â Hwb Hamdden a Lles newydd Caerffili i weld y cynnydd diweddaraf ar y datblygiad, sydd i fod i agor ym mis Mawrth 2027.
Mae’r prosiect yn parhau i ddatblygu’n dda ac yn unol â’r amserlen, gyda’r gwaith yn mynd rhagddo ar draws yr adeilad ac ar draws ei fannau mewnol.
Yn ystod yr ymweliad, fe wnaeth aelodau’r Cabinet ddysgu am sut mae’r cyfleuster newydd yn dechrau dwyn ffrwyth a’r gwaith sy’n mynd rhagddo i greu amrywiaeth eang o fannau hamdden, ffitrwydd a lles.
Ar ôl ei gwblhau, bydd y datblygiad yn darparu cyfleusterau modern a hygyrch ar gyfer nofio, ffitrwydd, chwaraeon, chwarae ac ymlacio, gan greu cyfleoedd newydd i drigolion o bob oed a gallu fod yn egnïol.
Dywedodd y Cynghorydd Chris Morgan, Aelod Cabinet dros Hamdden, “Roedd yn wych gweld y cynnydd sy’n digwydd a sut mae’r cyfleuster newydd yn dechrau dwyn ffrwyth. Mae hwn yn fuddsoddiad mawr yn iechyd a lles ein cymunedau, ac rydyn ni’n edrych ymlaen at agor y drysau ym mis Mawrth 2027.”
Mae’r datblygiad yn rhan allweddol o Strategaeth Chwaraeon a Hamdden Egnïol (2019–2029) y Cyngor, gan ategu ei ymrwymiad i greu cyfleusterau modern a hygyrch sy’n helpu trigolion i fyw bywydau egnïol ac iach.
