Daeth 260 o ferched o bob cwr o Fwrdeistref Siriol Caerffili at ei gilydd ar gyfer Gŵyl Pêl-droed Merched yn y Ganolfan Rhagoriaeth Chwaraeon, dan arweiniad Chwaraeon Caerffili.
Roedd yr ŵyl yn cynnwys 26 o dimau o 23 o ysgolion, gyda phob ysgol yn cynrychioli’r Fwrdeistref Siriol. Chwaraeodd timau mewn fformat 7 bob ochr, gyda charfannau o hyd at 10 chwaraewr, gan greu amgylchedd egnïol a chefnogol a oedd yn canolbwyntio ar gymryd rhan, mwynhad a datblygiad.
Roedd y digwyddiad yn blaenoriaethu profiad dros gystadleuaeth, felly ni chafodd enillwyr cyffredinol eu cyhoeddi. Darparodd y diwrnod brofiad gwerthfawr o chwarae gemau, gan helpu i fagu hyder a chreu cyfleoedd i ferched ddatblygu eu sgiliau mewn awyrgylch cadarnhaol. Mae cymorth ar gael i unrhyw gyfranogwyr a hoffai ymuno â’u clybiau cymunedol lleol yn sgìl yr ŵyl.
Cynorthwyodd myfyrwyr Coleg y Cymoedd y digwyddiad fel gwirfoddolwyr, gan gynorthwyo gyda’r trefniadau a helpu i sicrhau bod yr ŵyl yn rhedeg yn ddidrafferth. Hoffai Chwaraeon Caerffili ddiolch i’r myfyrwyr am eu brwdfrydedd, eu proffesiynoldeb, a’u cyfraniad gwerthfawr ar y diwrnod.
Dywedodd y Cynghorydd Chris Morgan, Aelod Cabinet dros Hamdden
“Mae gweld 260 o ferched yn chwarae pêl-droed mewn un digwyddiad yn wych. Roedd yr awyrgylch drwy gydol y diwrnod yn anhygoel. Roedd hi’n wych gweld cymaint o waith tîm a mwynhad. Mae cyfleoedd fel hyn mor bwysig o ran helpu pobl ifanc i fagu hyder, datblygu eu sgiliau, a darganfod mwynhad gydol oes o fod yn actif.”
Mae’r Ŵyl Bêl-droed yn cefnogi nodau Strategaeth Chwaraeon a Hamdden Egnïol Cyngor Caerffili, sy’n canolbwyntio ar gynyddu cyfranogiad a chreu cyfleoedd cynhwysfawr. Hefyd, mae’n helpu mwy o bobl ifanc i ddatblygu perthnasoedd cadarnhaol gydol oes â chwaraeon a gweithgarwch corfforol.
